14 Mar Por que non nos volvemos bicar
A Banda Aldaolado está formada polas poetas Lucía Aldao e María Lado e polas músicas Violeta Mosquera na batería, Macarena Montesinos no baixo e Rubén Abad na guitarra. En 2019 Aldaolado centráronse en compoñer cancións con letra e música propia, temas que inclúen poemas da súa autoría. Así chegaron a xuntar un bo feixe de pezas que recolleron en dous discos de estudio producidos por Mig Seoane. O primeiro deles foi publicado en 2021 co nome de ‘CASA!’. Este 2023 veñen de presentar ‘Forestal’, o seu segundo traballo de estudio en formato banda do que destacamos o seu primeiro single “por que non nos volvemos bicar”. Tras toda unha traxectoria bebendo da oralidade e do directo máis acolledor, chega un agardado Aldaolado con banda, unha proposta máis expansiva para vestir as creacións das dúas poetas con novas texturas e acompañamentos sen ter que renunciar á proximidade de sempre. Nesta viaxe tamén se embarcou a artista Greta Debelius, que deseñou o cartel para a estrea na Coruña da Banda Aldaolado.